Би хүүхэд байхын бичил ертөнц, аливаа юмсын бүтэц зохион байгуулалт, зүй тогтлыг тайлж мэдэх гэсэн эрмэлзэлтэй хүүхэд байсан. Мөн аав, ээж хоёрын минь хими, биологич мэргэжил намайг бичил ертөнц, байгалын шинжлэх ухааны замнал руу хөдөлсөн байх гэж боддог. Микробиологич хэмээх мэргэжлийн гол онцлог нь бид хэзээ ч энгийн нүдээр харж чадахгүй бичил ертөнцийн оршин суугчидтай өдөр бүр учирч, тэдний хязгааргүй бүтээмжит чадварыг зөв зүгт чиглүүлэн залах, мөн сүйтгэх хүчийг нь сарниулах, устгахад хамаг анхаарлаа хандуулан ажилладагт оршдог. Мэргэжлийн өндөр ур чадвар шаардсан хөлс хүчээ шавхсан сорил бүрийн ард амжилттай гарч, учирч болох эрсдэлийг урьдчилан харж тооцоолон үнэлж, зөв удирдаж ялалт байгуулах нь миний мэргэжлийн хамгийн бахархам сайхан зүйлсийн нэг.
Төгсөх курсынхээ намар санамсаргүй тохиолдлоор АПУ Хувьцаат компанийн итгэмжлэгдсэн лабораторид дипломын өмнөх дадлагын ажил хийх завшаан тохиолдсон нь энэ хүчирхэг, манлайлагч гэр бүлтэй хойшдын хувь заяагаа холбон нэгэн салаа мөчир нь болон өсөж, хөгжиж явахын эхлэл болсон. Дөнгөж төгссөн, 22 настай залуухан хүүд АПУ Хувьцаат компани хэмээх их айлын соёл, уламжлал, үнэт зүйлс, ажлын дадлага, туршлага мэдлэгийг харамгүй хайрлаж сургасан лабораторийн эрхлэгч Ш.Нансалмаа /Одоогийн АҮ-н дарга/, микробиологич Ч.Болормаа, лаборант Т.Даваа эгч нартаа маш их баярлаж талархаж явдаг.
Үүнээс хойш хэдийнээ 15 жил өнгөрчээ. Хамт олонтойгоо олон чухал ажлын ард гарсан байна. 2014 онд шар айргийн хөрөнгийг лабораторид хадгалах аргыг өөрчилж, хуурай хэлбэрээс шингэн хэлбэрт шилжүүлснээр хөрөнгө исгэж, үйлдвэрт өгөх 5 хоногийн хугацааг 1 хоног болгож богиносгож чадсан. Үүний үр дүнд үйлдвэр хөрөнгө хүлээж цаг алддаг байсан хугацааг арилгаж, хөрөнгө хурдан эргэлтэнд орж, шар айраг төдий хугацаагаар эрт бэлэн болох эдийн засгийн ач холбогдолтой ажил болсон. Уг үйл явц 1.5 жилийн судалгаа, маш их хөдөлмөр сэтгэл зүтгэл шаардсан ажил байсан. Мөн 2013 онд Германы Калтенберг шар айргийг үйлдвэрлэх эрхийг авсны дараа шинжилгээний болон бусад стандарт, шинэ хөрөнгө, түүний үржүүлэн өсгөвөрлөх аргыг өөрийн болгон нутагшуулж авах, шинжилгээний стандартыг шинжлэх ухааны үндэслэл дээр хэрэгжүүлэн ажиллах, амаргүй боловч сонирхолтой ажлын ард баг хамт олноороо амжилттай гарсан.
Компани маань томоохон хөрөнгө оруулалтууд хийж, шинэ технологи нутагшуулахын хэрээр тухайн ажилтнаас мэдлэг, ур чадвар, зөв хандлага, шинийг санаачлагч байх, хөгжилд тэмүүлэгч байх, багийн сайн хамтрагч байх шалгууруудыг тавьж, хүн бүр тэгш эрхтэйгээр хөгжилд тэмүүлэх боломжийг олгосоор ирсэн. Энэ сайхан хамт олны нэг хэсэг байгаадаа үргэлж талархаж явдаг даа.