Би дунд сургуульд байхдаа тооны хичээлдээ дуртай байсан болохоор санхүүгийн мэргэжил илүү ойр санагддаг байсан. Тэр сонирхлоо даган ХҮИС-ийг нягтлан бодогч, бизнесийн удирдлага мэргэжлээр суралцаж, төгссөн жилдээ MBC компанид орж байлаа. MBC компани дэлхийн 190 гаруй оронд бүтээгдэхүүнээ борлуулдаг, алдарт HEINEKEN компанийн хөрөнгө оруулалттай байсан тул дэлхийн шилдэг компанийн туршлагаас их олон зүйлс сурч авсан. Бүх зүйл нь тогтсон нэг стандарттай, бүх шатандаа бизнесийн үйл ажиллагааны процесс нь тодорхой, тогтсон дүрэм журмын дагуу өдөр тутмын үйл ажиллагаа нь явагддаг. Энэ бол бизнес өсөн дэвжихэд их том хөшүүрэг болдог. Санхүүгийн мэргэжил бол алдах эрхгүй, хариуцлагатай байхыг хувь хүнээс шаарддаг.

Бид багаараа HEINEKEN компанийн Ази, Номхон далайн бүс нутгийн нийт 20 гаруй улсын Санхүүгийн албадын дунд явагддаг “Be the best” буюу тайлан мэдээгээ цаг тухайд нь алдаагүй хүргүүлэх, санхүүгийн багийн шинэ бүтэц зохион байгуулалтыг HEINEKEN-ийн шаардлагын дагуу нэвтрүүлэх, санхүүгийн тайлагналын дотоод хяналтыг сайжруулах гэх мэт мэргэжлийн хүрээг хамран явагддаг уралдаанд 2015 онд 3-р байр, 2016 онд амжилтаа ахиулан Тэргүүн байр эзэлж, 10,000 еврогоор шагнуулж байсан. Ажил мэргэжлийнхээ хүрээнд олон улсын шилдгүүдтэй өрсөлдөж, хичээл зүтгэлээ үнэлүүлнэ гэдэг үнэхээр сайхан. Монгол мэргэжилтнүүд дэлхийн хаана ч өрсөлдөхүйц хэмжээний мэдлэг чадвартай юм байна гэдгээ багаараа нотлон харуулсан бахархалтай үйл явдал байсан. Ингээд компанийнхаа Тогтвортой хөгжлийн “Илүү сайхан дэлхийг цогцлооё” стратегийн хүрээнд бид шагналынхаа мөнгийг өөрсдөдөө биш хэрэгцээтэй хүмүүст нь хүргэхээр шийдсэнээ Байгууллагын Харилцааны газартаа хэлснээр бид хамтран Баянзүрх дүүргийн Засаг даргын тамгын газарт хандан тус дүүргийн тусламж нэн шаардлагатай 10 айлд иж бүрэн таван ханатай гэр бэлэглэж байлаа. Залуу хүний хувьд АПУ компанид ажиллахдаа бахархалтай байдаг олон хүчин зүйлс бий. Тэдгээрийн нэг нь хамт олныхоо сурч хөгжих нөхцөлийг нь бий болгож, илүү бүтээлч ажиллах боломжийг бүрдүүлдгийг онцлон дурдмаар байна. Мөн орчин үетэйгээ хөл нийлүүлэн алхаж, техник технологийн дэвшлийг үр дүнтэй ажилдаа ашиглах талаас нь олон шинэ төсөл хөтөлбөр хэрэгжүүлж, үүндээ хүн бүрийг оролцуулах замаар хувь хүний болон компанийн өсөлт дэвшилд хүргэж байдаг нь сайхан санагддаг. Хамгийн сүүлд АПУ групп компанийн хэмжээнд ихээхэн хүч, хөрөнгө зарцуулан хэрэгжүүлж байгаа борлуулалт ложистикийн нэгдсэн программын төслийг багийнхныхаа хамт амжилттай нэвтрүүлээд, өдөр тутмын үйл ажиллагаандаа ашиглаж эхлээд байгаа. Монгол өв соёлоо, уламжлалаа дээдлэн шинийг бүтээж буй 100 жилийн түүхтэй Монгол Улсын шингэн хүнсний салбарын тэргүүлэх компани болох АПУ компанидаа үе үеийн олон сайхан чадварлаг хүмүүстэй мөр зэрэгцэн хамтран ажилладгаараа үнэхээр бахархдаг.

“Намайг 2004 онд АПУ ХК-д ажилд орох үед техникүүдээ ид шинэчлэн, Германы дэлхийд алдартай “Krones” брэндийн тоног төхөөрөмжүүдийг хэдийнээ ашиглаад эхэлчихсэн байлаа. Хүч эр нь жагссан, эрчтэй чадалтай техник ашиглана гэдэг бол инженерүүд бидний хувьд бас нэгэн бахархал шүү дээ. АПУ маань дэлхийн түвшний, хамгийн супер техник технологиудыг оруулж ирж үйл ажиллагаандаа нэвтрүүлдэг нь урамтай сайхан байдаг.

Аав маань инженер хүн байсан болохоор би энэ мэргэжлийг өөрөө дурлаж сонгоод, тухайн үеийн ЗХУ-ын Одесс хотын Одессийн Хөргөлтийн дээд сургуулийг хөргөлтийн инженерээр төгсөж байлаа. Тэр цагаас хойш одоо ч гэсэн суралцсаар байгаа гэж хэлж болно. Инженер хүн бүхнийг сураад, мэдээд болчихлоо гэж байдаггүй. Техник технологи цаг ямагт хөгжиж, дэвшиж байдаг учраас үүнийг дагаад бид ч бас арга ажиллагаагаа өөрчилж, суралцаж хөгжсөөр байдаг гэж би боддог. Шинэ юмыг сурна, өөрийн болгоно гэдэг сонирхолтой бас зугаатай шүү дээ.

“Эмнэг сургана” гэдэг шиг тухайн техник, тоног төхөөрөмжийг ойлгож, “сургаж”, өөрийн болгох гэдэг том даваа байдаг. Компани дээр ямар нэгэн техникийн шинэчлэл хийх болоход дагаад заавал сургалтууд явдаг, мөн тухайн техникийг үйлдвэрлэгч, эсвэл ашиглаж буй газар нь очиж нүдээр үзэж арга ажиллагаатай нь танилцдаг. Манайх Германы техник технологи ашигладаг учраас Герман улс руу цөөнгүй удаа явж туршлага судалж байсан. Анх гадны технологи, том үйлдвэрүүдийг хараад сүрдэх, бишрэх сэтгэгдэл аяндаа төрдөг байлаа. Дараа нь тэдгээрийг үйлдвэртээ авчирч, өөрсдөө угсарч яг нүдэн дээр тэр нь хөдлөөд, ажиллаад эхлэхээр хүний, холын санагдахаа больж, өөрийн эрхгүй бахархах сэтгэгдэл төрдөг. Шар айраг үйлдвэрлэлээр дэлхийд тэргүүлэгч Германы томоохон үйлдвэрүүдтэй ижил түвшний техник ашиглан үйлдвэрлэл явуулдаг учраас манай техник инженерүүд дэлхийн хаана ч очоод ажиллахад мэдлэг чадвараар дутахгүй. Энэ бол инженер миний бахархал мөн.

Компанидаа ороод 17 дахь жилийн нүүр үзэж байна. Өглөө ажилдаа баяр хөөр, урам зоригтой ирэх шалтгаан болгоныг бүрдүүлж чадсанд нь баярладаг. Зөвхөн АПУ-гийн хүмүүс ойлгох, тэднээс мэдрэгддэг нэг тийм халуун дулаан, дотно уур амьсгал бидэнд бий. Жишээ нь: Манай инженерүүдийн уламжлал шахуу болсон нэг зүйл бол үйлдвэрлэлийн аль нэг процесст гэмтэл алдаа гарлаа гэхэд бүх инженерүүд хамт байж, тэр асуудал шийдэгдэн гольдролдоо орох хүртэл нь багаараа ажилладаг. Энэ бол ажил үүргийн хувьд тэгэх ёстой гэсэндээ биш, бид нэг том цул зүйлийг хамтдаа хөдөлгөж байгаа шүү гэсэн нэгдмэл сэтгэлийнх гэж би боддог юм.”

“Би Ховд аймгийн Манхан сумын хүн. Цэрэгт явж ирээд л сар болов уу үгүй юу сумандаа галчаар ажилд орсон. Тэр цагаас хойш тасралтгүй ажилласаар байна даа. 2004 онд эхнэр 5 хүүхдийнхээ хамт Улаанбаатар хотыг зорьсон.

Хотод ирээд шууд л АПУ ХК-д нээлттэй ажлын байр зарлагдсан байсанд ихэд олзуурхан хүсэлт гаргаж, ажилдаа ч орсон. Түүнээс хойш энэ компанитай хувь заяагаа холбож, сайхан хамт олноор хүрээлүүлэн ажиллаж байна. Би 2004 онд АПУ компанид ажилд орж, 2006 онд гэр бүлийн хүн маань үйлчлэгчээр ажилд орсноор манай гэр бүлийн амьдрал энэ компанитай нягт холбогдсон юм. Түүнээс хойш 20-иод жил өнгөрчээ. Энэ хугацаанд хүүхдүүд маань сургууль соёл төгсөж, хоёр хүүхэд маань тусдаа гарсан байна.

АПУ ХК-ийнхаа ажилтнуудад ажиллах таатай, цэвэр орчныг бүрдүүлэн ажилладаг. Хүн сэтгэлээсээ, ажлыг гололгүй хийж хамт олонтой, ажилтай байх шиг сайхан зүйл байхгүй шүү дээ.

Манайх надаас гадна талбайн хоёр үйлчлэгчтэй. Тэд нар маань ажилд ороод 2, 3 жил болж байна. Анх цэвэрлэгээний багаж, тоног төхөөрөмжийг хэрхэн ажиллуулах вэ зэрэг зүйлс дээр зөвлөдөг байлаа. Одоо бол бүгд ажилдаа гаршсан. Бид талбайгаа хуваарилж аваад л цэвэрлэгээгээ хийчихнэ.

Хамт олон маань намайг Тэдди ах гэдэг юм. Манайхан өглөө ажилдаа ирээд хамгийн түрүүнд мэндэлдэг хүн нь би ч байж мэднэ. Тэдди ах гээд манайхан намайг андахгүй ээ. Миний хийж байгаа ажлыг хүндэлж, миний насыг ч хүндэлдэг эерэг сайхан хамт олон дунд цаг хугацаа мөн ч хурдан өнгөрчээ. Би тэднээсээ урам, хүндлэл хүртдэг юм.”

“Арван жилээ төгсөөд Герман руу инженерийн бэлтгэлд явж, дараа нь мэргэжлээ сонгох болоход ‘Исгэлтийн ундааны технологич инженер’ гэдэг дээр тогтлоо. Тухайн үед энэ дөрвөн үгнээс ‘ундаа’ гэдэгт л ач холбогдол өгч, эмэгтэй хүнд ойрхон юм болов уу хэмээн сонгож байлаа. Гэтэл нийт хичээлийн маань бараг 80 хувь нь шар айраг исгэх технологи арга ажиллагааны тухай байж билээ.

Шар айраг үйлдвэрлэл маш нарийн, онцлог технологитой, арвайн соёолж хүлээж аваад хэрэглэгчид хүрэх хүртэл 40 гаруй процесс, шинжлэх ухааны үндэслэлтэй бүтээгдэхүүний өөрчлөлт хувиргалт өрнөдөг. Зүйрлэвэл олон ааштай хүний эвийг олж чухам онцгой нэг л дундыг барьж, үргэлж тэр хэвээр тогтоон барихтай адилхан. Энэ утгаараа маш сонирхолтой. Би өөрөө аливаад дүн шинжилгээ хийх, нарийн түвэгтэй процессийн учир начрийг олох дуртай хүн. Тийм болохоор хувь хүнтэй маань ч нийцдэг болов уу.

Миний хувьд 2006 онд АПУ ХК-д Чанарын менежерээр ороод 2012 оноос хойш Шар айргийн үйлдвэрийн даргаар ажиллаж байна. Намайг орох үед Орос суурьтай технологийг Герман технологи руу шилжүүлэх процесс ид өрнөж байсан. Шар айргийн үйлдвэрлэл, соёлоороо дэлхийд тэргүүлдэг Германд мэргэжлээр нь төгсөөд ирсэн надад өөрийн сурсан мэдсэнээ практикт турших сонирхолтой, хариуцлагатай ажил байсан. Техник технологийн хувьд Германдаа төдийгүй дэлхийд №1 гэж тооцогддог ‘Krones’-ыг ашигладаг. Шинэ мэргэжилтний хувьд ийм суурин дээр ирж ажиллана гэдэг мөрөөдөл, аз завшаан шүү дээ.

800 жилийн түүхтэй, Баварийн хаадын удмын “Калтенберг” брэндийг Азидаа анх удаа лицензийг нь авч, үйлдвэрлэх ажлыг багийнхаа хамт гардан гүйцэтгэсэн. Бэлтгэл ажлыг хангаж, судалгаа хийж, технологийн шийдлийг олох бүх процесс сонирхолтой байсан. Бэлэн зүйлийг хуулаад авчрах биш, өөрийн үйлдвэртээ буулгаж нутагшуулах гэдэг том ажил л даа. Тэр үед хамтран ажилласан “Калтенберг”-ийн Герман мэргэжилтэн “Би олон газар ажиллаж, олон үйлдвэртэй харьцаж байсан. Ингэж өөрийн үйлдвэрт яг таг буулган нэвтрүүлсэн багтай тийм олон таараагүй шүү” гэж хэлэхэд хамт олноороо, компаниараа үнэхээр их бахархаж байлаа. Энэ бол ажлын “ялалт” шүү дээ. Хамгийн гоё ялалт.

Сургуулиа төгсөөд 20 орчим жил болж байна. Гэсэн ч миний хувьд сурах процесс дуусаагүй л байгаа. Техник технологи үргэлж шинэлэгдэж, сайн сайхныг бүтээж бий болгоё гэсэн тэмүүлэл үргэлж хөгжиж дэвжиж байдаг болохоор бид ч гэсэн цаг мөч бүр суралцсаар байх ёстой гэж би боддог. Хүмүүсээ ч гэсэн ойр ойрхон сургалтанд хамруулж, гаднын үйлдвэрүүдээс туршлага судлуулах их дуртай. Ялангуяа манайх Герман технологитой учир шар айргийн үйлдвэрлэлээр дэлхийд тэргүүлэгч Герман руу манай олон мэргэжилтэн явж байсан. Мэргэжилтнүүдтэйгээ Герман явж, төгссөн сургуулийнхаа профессортой уулзахад “Манай Энх-Эрдэнэ Монголын хамгийн том шар айргийн үйлдвэрийг удирдаж байгаа” хэмээн хүмүүст бахдан танилцуулсан нь миний хувьд нэр төрийн хэрэг байлаа.”

“Би хэзээ ч жолооч болохгүй гэдэг охин байлаа. Аав маань насаараа жолооч хийсэн хүн. Миний охин жолоонд суувал яасан юм гэхээр нь үгүй гээд яагаад ч юм машин барихаас айдаг байсан. Одоо гэтэл АПУ ХК-ийн сэрээт машины жолооч гэхээр итгэмээргүй ч юм шиг. Тэр дундаа сэрээт машины анхны эмэгтэй жолооч шүү бүр.

Анх 2008 онд АПУ ХК-ийн Хангамжийн албанд Орон нутгийн савлагчаар ажилд орж байсан. Ажлын шугамаар жолооч нартайгаа ойрхон байдаг болохоор сэрээт ачигч машин нь сонирхол татаад, нэг бариад үзчих юмсан гэж бодогдоод хорхой хүргэнэ. Урьд нь би ийм техник харж байгаагүй, эрэгтэй хүмүүс л жолооддог гэж бодож явсан. Цахилгаанаар ажилладаг, урдаа хоёр өргөгч сэрээтэй, тоглоомон машин шиг л харагддаг. Гэтэл нэг өдөр албаны дарга маань дуудаад “Сэрээт ачигчийн эмэгтэй жолооч бэлдэнэ. Нэгээр нь чамайг сонгож байна” гэхэд гайхаж бас баярлаж хүлээж авсан. Хэрэв тэр үед дарга маань надад итгэл, эрч хүч, урам зориг өгөөгүй бол ийм сонирхолтой ажлыг хийхгүй байх байж шүү дээ. Эмэгтэй хүн нямбай, няхуур учраас нэг сураад авчихвал эрчүүдээс илүү гүйцэтгэнэ гэж тухайн үед дарга маань бодсон байх. Үнэхээр ч энэ шийдвэр, алсын хараа нь зөв байсан.

Би өглөө бүр 5.30-д сэрээд, 7.10 цаг гэхэд ажил дээрээ ирчихсэн байдаг. Уг нь ажил маань 8.30 цагт эхэлдэг ч эрт очиж өөрийгөө бэлдэх, аюулгүй ажиллагаагаа сахих, хамгийн гол нь машинтайгаа мэндлэх чухал “ажилтай”. Хүмүүс шоолох л байх, би гэхдээ машинтайгаа яг л хүн шиг ярьж, “Сайн цэнэглэгдэж, сайхан амарсан уу” гэж өглөөний ажлаа эхлүүлдэг (инээв). Яагаад гэвэл машин маань намайг ирэхэд асаж, намайг явахад сая нэг амарна. Өдрийн турш үргэлж хамт байдаг, үнэнч анд минь шүү дээ. Машин бид хоёр түүхий эд, материал хүлээн авахаас эхлээд эцсийн бүтээгдэхүүнийг түгээлтэд хүргэн ачдаг болохоор үйлдвэрлэлийн эхлэл цэгээс эцсийн цэг хүртэлх гол ажлыг нугалдаг. Ингээд бодохоор хариуцлагатай, үнэ цэнтэй сайхан ажил. Хүмүүст ажлынхаа тухай хэлэхээр бүгд л гайхаж хүлээж авна. Эхлээд сэрээт ачигч машин гэж юу болох тухай, дараа нь эмэгтэй хүн ийм ажлыг гардаж хийдэг гэж үү дээ гэсэн гайхсан асуултад нь хариулах хэрэг гардаг.

Хүн ажлаа дуртай хийж, бүхнээ зориулах хамгийн гол хүчин зүйл бол хамт олон. Харилцаа, хандлага хамгийн чухал. Нэгэнт л өдрийн идэвхит хамаг цагаа зориулж буй учраас ажилдаа сэтгэлээсээ, өөриймсөг хандахыг би эрхэмлэдэг. Мэдсэн сурсан зүйлсээ бусадтайгаа хуваалцаж, эргээд тэднээсээ суралцаж, хамтдаа өсөж дэвжинэ гэдэг хамгийн гайхалтай.”

‘Хүн хоорондын харилцааны донжийг олно гэдэг урлаг. Ажил хэргийн уулзалт ч гэсэн хувь хүний харилцааны соёл, ‘ньюанс’ дээр тодорхой хэмжээнд тогтож, нөлөө тусгалаа үзүүлэх нь бий. Тийм учраас Худалдааны төлөөлөгчийн ажилдаа би дуртай. Өдөрт 40-50 харилцагчтай уулзаж, холбогдох хэрэг гарна. Хэдийгээр их юм шиг санагдаж болох ч надад бол харин ч кайфтай, хувийн араншинтай маань ч нийцтэй санагддаг. Би хүмүүстэй харилцах дуртай.

АПУ ХК-ийн худалдааны төлөөлөгчийн хувиар би чанар, үнэ цэн, харилцаа “худалддаг”. Энэ зах зээлд цөөнгүй өрсөлдөгч байдаг болохоор өөрийн компанийн онцгой давуу талыг эхлээд өөрөө маш сайн ойлгож ухаарах, түүнийгээ харилцагчид зөв зүйтэй ойлгуулж, урт хугацаанд харилцаа, итгэлцэл үүсгэх нарийн ажил л даа. Миний хувьд цаг барих, хүний цагийг хүндлэх гэдэг хамгийн үнэт чанар. Тийм учраас урьд орой нь маргаашийн ажлаа төлөвлөж, дэвтэр дээрээ ягштал тэмдэглэж явдаг. Зузаан дэвтэр маань сар болоод л дуусчихна. Сүүлийн жилүүдэд би дууссан тэмдэглэлийн дэвтрүүдээ нандигнан хадгалдаг болсон. Яагаад гэвэл энэ миний ажлын төдийгүй амьдралын түүхийн нэг томоохон хэсэг гэдгийг ухаарсан болоод тэр.

Сүүлийн бараг 20 жил тасралтгүй хүмүүстэй харилцаж, өдөрт хэдэн арван хүнтэй уулзаж явдаг надад хөл хорио үнэхээр хэцүү байсан. Бушуухан ажил эхлээсэй гээд гэртээ ч тогтож өгөхгүй. Яагаад гэвэл энэ миний амьдралын хэв маяг, намайг аз жаргалтай, эрч хүчтэй болгодог зүйл нэгэнт болсон байна. Үүнийг хөл хориогоор гэртээ хэсэг суухдаа анзаарлаа.

Манай албанд залуус их орж ирдэг. Энэ хугацаанд олон шавь төрүүллээ. Тэд нараасаа эрч хүч авч, залуу хүмүүсийн энергид хөтлөгдөн урам зоригтой ажилласаар байна. Би залуустаа “Чи зөвхөн бараа зарж байгаа хүн биш. Чи бүхэл бүтэн компани төлөөлж, харилцаа үүсгэж, итгэлцэл бий болгож байгаа төлөөлөгч шүү” гэдгийг сайтар ойлгоосой гэж захидаг. Хүний харилцаа олон хүчин зүйл дээр тогтож байдаг, итгэлцэл гэдэг удаан хугацаанд үүсдэг болохоор уйгагүй, тэвчээртэй, хамгийн гол нь мэдрэмжтэй байх нь их чухал. Заримдаа сэтгэл зүйч шиг ч санагдана. Олон жил Худалдааны төлөөлөгчөөр ажилласан надад арга эв нь олдохгүй, харилцахын аргагүй хүн гэж одоо байхгүй. Хүн болгоны хувь чанарын онцлог гэж бий болохоос сайн, муу хүн гэдэг ойлголт ч өрөөсгөл санагдах нь бий.

Дуртай ажлаа, жаргалтайгаар хийнэ гэдэг өөрөө их гоё ойлголт. Үр дүн, гүйцэтгэл, хандлага сэтгэл хөдлөл ч сайхнаар хөглөгдөөд ирнэ дээ. Миний хувьд жилийн 12 сарын талаас илүүд нь “Сарын шилдэг ажилтан” болж байсан үе бий. Сарын шилдэг ажилтан болоогүй жил байхгүй юм байна. Тэгээд Сингапур, Япон, Бээжинд аялах эрхээр шагнуулаад л явж өгнө дөө”.

“Их сургуулиа төгсөөд хоёр сарын дараа анхны ажилдаа орох гээд ярьчихсан, бүр диплом анкетаа бариад алхаж явлаа. Гэтэл манай сургуулийн профессор залгаад дэлхийд алдартай HEINEKEN-ийн хөрөнгө оруулалттай үйлдвэрт ажлын байр байна гэнэ, шинэ төгссөн сайн оюутнаасаа явуулаач гэнэ гэхээр нь зүгээ өөрчлөөд шууд тийш явсан нь одоо бодоход амьдралыг маань өөрчилсөн алхам байсныг тэр үед яаж мэдэх билээ.

Ажлын ярилцлагын дараа намайг авах эсэх хариу гартал 21 хоносон. Дараа нь сонсоход инженерийн албанд эмэгтэй хүн тохирох болов уу гэдэг тухай байсан юм билээ. Тэгээд ажилд орох болоход “Бид чамтай эмэгтэй инженер гэж харьцахгүй. Инженер хүмүүстээ тавьдаг тэр л шаардлагыг тавьж ажиллана. Амжилт хүсье!” гэсэн товчхон яриа болж байсан. Үнэхээр ч өнөөдрийг хүртэл ажиллахдаа хүйсийн давуу, сул тал ажилд маань гараагүй. Үйлдвэрийн өндөр гэрлүүдийг солихоор угсармал урт шатан дээр гарах үед сандрах, өөрөө өндрөөс айдаг болохоор эвгүй санагдах үе байсан ч гэлээ “би эмэгтэй хүн” гэж бусдыг гуйхгүй, харин би инженер хүн, энэ миний хийх ёстой зүйл гэж өөрийгөө зоригжуулдаг байсан. Анх цахилгаан автоматын техникчээр ажилд орж байсан бол одоо Инженеринг менежер болж дэвшсэн. АПУ компанийн TIGER үйлдвэрийн Инженерийн албыг ахалж байгаа.

Багийнхаа хамт томоохон олон төслийн ард гарч, өдийг хүртэл урам зоригтойгоор ажлаа хийж байгаа маань надад сайхан санагддаг. Өөрийгөө хөгжүүлэх, өсөж дэвжих боломж бүрийг алдахгүйг хичээдэг. Миний хувьд Сингапур, Тайланд, Малайз зэрэг орны HEINEKEN-ийн үйлдвэрүүдэд сургалтанд хамрагдаж, туршлага судалж байсан. Дэлхий дамнасан томоохон компанийн стандартаас суралцаж, мэргэжлийн ур чадвараа дээшлүүлнэ гэдэг залуу хүнд тэр бүр олдохгүй ховор боломж. Олон улсын туршлагаас суралцаад, мөр зэрэгцээд ирэхээр Монгол хүн дэлхийн хаана ч ажиллах чадвартай гэдгийг мэдрэх бахдам сайхан. Дэлхийн стандарт гэдэг үг одоо бидэнд хол сонсогдохоо больсон.

Байгальд ээлтэй үйлдвэрлэл явуулах нь манай компанийн хамгийн том зорилгуудын нэг. Миний хувьд цахилгаанаа хэмнэх нь байгаль орчинд үзүүлэх хор нөлөөг бууруулах өдөр тутмын хамгийн чухал дадал санагддаг. Тийм учраас “Гэрлээ унтраагаарай” гэдэг үг миний ажил дээрээ хамгийн их хэлдэг үгсийн нэг байх (инээв). Манайхан заримдаа шоолоод танай хүүхэд “Гэрлээ унтраа” гэж хэлд орсон байх аа гэдэг юм. Ариун цэврийн өрөө ороод гарахдаа, ажлын өрөөнөөсөө түр гарсан ч гэсэн гэрлээ унтрааж хэвших, том заал даяар биш зөвхөн шаардлагатай хэсгийн гэрлийг ашиглах зэргээр дадал болгох нь хувь хүний байгаль орчинд үзүүлж буй хамгийн том эерэг нөлөөлөл.

Хувь хүний мэдлэг, чадвар ахиж, байгальд ээлтэй, дэлхийдээ хайртай үйлдвэрлэл явуулж, ажил үйлстэйгээ хамт өсөж өндийнө гэдэг залуус бидний хувьд хамгийн бахдам хэрэг шүү дээ.”